Dúas participacións e dúas vitorias é o inmellorable balance desta tempada.
Iván Ares vive un momento especialmente doce: Non só é o líder no Campionato Galego de Kartcross, senón que o seu dominio vai máis alá dos circuítos galegos e dun tempo a esta parte esténdese ademais ás probas de estrada. Onte logrou xunto ao seu copiloto José Antonio Pintor a vitoria no Rallye Ría de Noia, de forma que xa encabeza con claridade a clasificación do Campionato Galego de Rallyes.
Aínda que no pasado Rallye de Lalín Ares liderara o rallye durante a maior parte da proba, aquí a historia foi diferente: «A nosa formulación ao inicio da carreira era tratar de manter un bo ritmo, o que nos permitiu situarnos terceiros. A partir de aí puidemos aproveitar as circunstancias que se deron.» – comentaba o piloto de Cambre, que a metade da carreira se fixo coa primeira posición tras o abandono de Pedro Burgo e os problemas de Martínez Barreiro.
Durante a tarde, Ares administrou a súa vantaxe para facerse co triunfo: «Unha vez que nos situamos en primeira posición, intentamos non perder a concentración: Non tiñamos que asumir demasiados riscos, pero tampouco podiamos permitirnos un erro. Foi fantástico lograr esta segunda vitoria, supoño que é unha recompensa a facer as cousas ben. Pelexar polo Campionato é de momento un soño, porque a tempada é longa e remata deempezar.Tenemos que seguir pensando rallye a rallye e sobre todo facer a nosa carreira en cada un deles. Se despois temos ocasión de gañar, como sucedeu hoxe, pois mellor que mellor. «
A próxima carreira para o equipo será o Autocrós de Arteixo, segunda proba do Campionato Galego desa especialidade, na que tamén Ares lidera a clasificación xeral tras a súa pasada vitoria en Santa Comba.
